प्रिय मैत्रणी

मन की बात की...?

अगं, प्रिये उठलीस की नाही...अजून काय आळोखेपिळोखे देत आहेस. चिमण्यांचा चिवचिवाट सुरू झालाय आणि ट्विटरवाल्यांचा टिवटिवाट. हे बघ तू आता अॅण्ड्रॉइड मोबाइल वापरायला सुरुवात कर. पाहिजे तर मी पाठवून देतो. आयला काय जांभया देतेस फोनवर. अगं, मोदी म्हणे भारतमातेबद्दल बोलले आणि ट्विटरवाल्यांनी टीकेचा ट्विटिवाट केला. तुला अजून माहीत नाही. हे बघ तू आता फोन ठेवून माझा इन्सल्ट नको करूस. आदीच सर्वांनी मोदींच्या नावाने मोदी इन्सल्ट इंडियाचा असा घोष लावलाय. आता मोदींनी असं का बरं बोलावं, हे तू मला विचारू नकोस. कसाही असला तरी देश आपला आहे. देशावर आपलं प्रेम आहे... काय काय म्हणालीस, मी विदेशात गेल्यावर असाच बोलेन म्हणून..हे शक्यच नाही..तुझ्यापेक्षाही सुंदरी आल्या तरी तुला विसरलो का मी? मग विदेशात जायची बातच सोड. मेरे मन की बात आपही तो हैं.....अगं आपलं ज्याच्यावर नितांत, नि:सिम प्रेम असतं ना ते असे काही बोलत नाहीत. ''पूर्वी अनिवासी भारतीयांना आपण भारतीय असल्याची लाज वाटायची, मात्र आता त्यांना भारतीय असल्याचा अभिमान वाटतो. देशातील सत्तेत परिवर्तन व्हायला पाहिजे, असे अनिवारी भारतीयांना वर्षभरापूर्वीच वाटत होते.'' अशी मोदीवाणी ट्विटिवली. अगं, तुला त्याचं काहीच वाटत नाही का? म्हणजे तुझा देशाभिमान असा अनिवासी झाला की काय? असं काय करू नकोस. माझ्या प्रेमाचं काय? हा सत्तेचा माज म्हण की अनेक वर्षांपासून सत्ता हातात आल्यामुळे पुन्हा भविष्यात सत्ता येईल की नाही याचा पत्ता नसल्यामुळे असं झालं असं समज, पण काही तरी घडलय-बिघडलंय एवढं मात्र नक्की! मला काय म्हणायचं, आपण कितीही भारावून गेलो आणि कितीही मोठे असलो तरी देश तो देशच ना...तू हूं काय करतेयस अद्याप झोप उडाली नाही का? उडाली ना..अजून उडेल. तू आताच जागली आहेस ना..अनिवारी बघ वर्षापूर्वीच जागले आहेत. त्यापूर्वी ते काय झोपा काढत होते याबाबत तू काय बोलू नकोस आणि मीही बोलत नाही..कारण अकारण वादाला कशाला तोंड फोडायचं....कारण काय आपण काही राजकारणी नाही, पत्रकार नाही की लेखक नाही...त्यामुळे वादाला तोंड फोडून घेण्यापेक्षा तू आदी तोंड धुवून ये मग मी तुझ्या फोन येईल या आशेने तोंड लावून बसतो माझ्या मोबाईलला... पण ऐक, तू फोनवर बोलशील ना ती फक्त मन की बातच बोल हा...नाहीत मनात एक आणि दिलात दुसरंच काहीतरी असायचं म्हणेज निदान मला अभिमान वाटेल असे बोल....तेव्हा तू माझा इन्सल्ट न करताच इन्संट ये वाट पाहोत.

तुझाच मन की बातवाला,

प्रेयस

प्रिय मैत्रणी

गेले वर्षभर वाट पाहतोय... कसली काय विचारतेस. म्हणजे तुला अद्याप माहिती नाही का? मैत्रिणी, मी जेवढी तुझी आतुरतेने वाट पाहतोय ना तितक्याच आतुरतेने वर्षभरापासून अच्छे दिनांची वाट पाहतोय. आज येतील अच्छे दिन, उद्या येतील अच्छे दिन असे मनाला सांगत आणि तुझ्या त्या खडूस बापाला कसं तरी तोंड देत कधी वर्ष सरलं ते कळलंच नाही बघ? काय माहीत आहे की, अच्छे दिन आले ना मग आपल्यासाठीसद्धा चांगेल दिन येतील. हे बघ असं तू भांडत वैगरे बसू नकोस. म्हणजे मला काय म्हणायचं, तुझ्यातलं आणि माझ्यातलं जे नातं आहे ना ते अगदी पक्कच असायला हवं. युतीसारख आज तुटेल उद्या तुटेल असं नको. काय मजा नाही अशा मैत्रीत. संसार दोघांनी करायचा आणि पुन्हा त्याच्यात वाद घालायचे. यातून भविष्य बिघडतं असं नाही का वाटत तुला. तू तिथं आणि मी इथं असल्यामुळे आजकाल आपल्यात त्या युती सरकारमधील जैतापूर अणुऊर्जा प्रकल्पावरून चाललेल्या वादासारखं झालं आहे. एकाने जैतापूर अणुऊर्जा प्रकल्पाला विरोध करायाचा आणि दुसऱ्याने प्रकल्प होणारच असा विश्वास व्यक्त करायचा...तुझ्यात आणि माझ्यात नेमके हेच चालले आहे. आता मोदी चीनच्या दौऱ्यावर आहेत तर जरा जपानला यावं जाऊन, असं तुला नाही का वाटत? तेवढेच फुकुशिमा बघून आले असते. असो. आता सरकारने ड्रॅगन समजल्या जाणाऱ्या चीनबरोबर करार केले आहेत, तेव्हा अच्छे दिन 'करा'त येतील अशी माझी भाबडी आशा आहे.

आपल्या प्रेमाला कुणाचं ग्रहण लागू नये यासाठी मी धडपडतोय. तर तुझा बाप अच्छे दिन के पिचे लगा है. गेल्या वर्षभरात अनेक निर्णय घेतले सरकारने, त्याचे फळ केव्हा मिळेल तेव्हा मि‌‌ळेल, पण आपण आशावादी असलं पाहिजे. सरकारचा पाच वर्षांचा संसार केव्हा मोडेल ते सांगता येत नाही, पण आपला संसार, आपलं प्रेम असं न मोडता राहायचं असेल तर सकारात्मक विचार करून स्वत:चं काहीतरी करायला हवं. निदान त्यामुळे तरी तुझे नि माझे अच्छे दिन नक्कीच येतील.

आपला आशावादी प्रेयस

दाऊद तुला शोधू कुठे...?

कैफ...मग तो मद्याचा असो, सत्तेचा असो वी नैतिकतेचा असो, तो केव्हाही वाईटच असतो. हा विचार सत्ताधारी, राजकीय नेते, श्रीमंत आणि अतिश्रीमंत (काही सन्माननीय अपवाद) यांना बऱ्याच अंशी लागू होतो. भाजप जाणतेपणा करीत सत्तारुढ झाला मात्र त्या पक्षाच्या नेत्यांनी जाणते-अजाणतेपणी वक्तव्यांची जी काही मुक्ताफळे उधळली यावरून सत्तेचा कैफ काय असतो, याचा अर्थ कळायचा मार्ग मोकळा होतो. हाच कैफ अर्थात माज मग आपण काय बोलतो, कुणासमोर बोलतो, आपलं काय स्थान आहे, आपण किती जबाबदार आहोत, याचे भान विसरवतो. भाजप नेत्यांमध्ये एकाने वक्तव्य केले की दुसऱ्यानेही लगेच दुसरे वक्तव्य केले पाहिजे, असा काही अलिखित नियम घालून घेतला आहे की काय , अशी शंका घ्यायला काहीच हरकत नाही. दाऊदवरून भाजपच्या नेत्यांनी जो वक्तव्यवाद घातला तो सत्ताधाऱ्यांना शोभणारा नाही. दाऊदच्या शोधाचा जो काही ऊहापोह केला जातोय त्यावरून दाऊदही स्वत:चा उदोउदो करून घेत असेल. जीभ आहे आणि तिला ३२ दातांची संरक्षक भिंत आहे म्हणून विचार न करता टाळ्याला लावता कामा नये. पण करणार काय? सत्तेपुढे शहाणपण घालीन लोटांगण करत असल्यामुळे यांच्या तोंडावर हात कोण धरणार, हा यक्ष प्रश्न आहे. राजकीय नेते असे काही अतार्किक वक्तव्य करतात आणि नंतर तोंडघशी पडतात, हा प्रश्न यक्षालाही सतावत असेल. सत्तेवर येण्यापूर्वी भाजपने दाऊदला भारतात आणू असे सांगितले होते. त्यामुळे काँग्रेसने हा मुद्दा उचलून धरल्याने भाजपपुढे अडचणी वाढल्या. त्यातच दाऊद कुठे आहे हे माहीत नसल्याचे वक्तव्य गृहराज्यमंत्री हरिभाई चौधरी यांनी केले आणि ते भाजपच्या चांगलंट अंगलट आले. त्यामुळे चौधरींच्या वक्तव्यावर सारवासारव करण्याची पाळी गृहमंत्री राजनाथ सिंह यांच्यावर आली. त्यामुळे टीम भाजप आता दाऊदला शोधायला बाहेर पडणार की नाही, हे काँग्रेसला पाहावे लागेल.

पोटे भरलेली अन् पोटे रिकामी...
वांद्रे विधानसभा पोटनिवडणूक संपली तरी वाद-विवाद आणि आरोप-प्रत्यारोपांचा शिमगा संपलेला नाही. आरोप-प्रत्यारोपांची उधळण सुरूच आहे. या निवडणुकीतील निकाल हे धक्कादायक नसले तरी प्रतिष्ठेला धक्का देणारे ठरले. कोण हरले, कोण जिंकले, कोणाला काय मिळाले, यांचे मंथनही झाले. त्यामुळे कलानगरच्या कट्ट्यावर पोटतिडिकीची चर्चा सुरू झाली. पत्रकार संपादके, राजकारणात रमलेले राजकारणे, वटवट करणारी टीव्ही अँकर नेहा नटवे, सत्य बोलणारे सत्या सदावर्ते, समाजाची काळजी करणारे समाजे, वैचारिक पाजणारे विचारे आणि नेहमीच सामान्यपणे राहणारे सदा सामान्ये यांच्यात वांद्रे पोटनिवडणुकीवरून कलानगरच्या कट्ट्यावर कलेकलेने चर्चा सुरू झाली.
'कोंबडी पळाली...तंगडी धरून...लंगडी घालायला लागली...कॉक कॉक..' 'अहो नटेव मॅडम, ही सभा आहे, तुमच्या बुलेटिनची सुरुवात नाही'..वटवट करणाऱ्या नटवेची नांदी मधेच तोडत संपादके बोलते झाल्याबरोबर नाक मुरडत नटवेंनी मान वळवली. 'काय गं नटवे, कोंबडीवरून असे पुगवे येण्याचे कारण काय?' मधेच विचारे विचारते झाले आणि नटवेंचे पुगलेले तोंड फुलून आले आणि तिने संपादकेंकडे एक कटाक्ष टाकला. 'अहो, विचारे, त्या वांद्रेच्या पोटनिवडणुकीत नाही का कोंबड्या नाचवल्या... त्या मी टीव्हीवर गाजवल्या, पण या संपादकेंना मधेच त्या कोंबड्यांचा कैवार आला अगदी 'त्यां'च्यासारखा.' नटवेने संपादकेंवर वार केला. नटवे पुन्हा तोंड उघडणार तेवढ्यात 'मला काय म्हणायचे, माणसांचा विजय झाला की प्राण्यांचा बळी जातोच की...' विचारेंनी वैचारिक मांडले. या वैचारिकानंतर संपादके बोलते झाले, 'विचारे, अहो तुम्ही असा विचार करायला केव्हापासून लागलात?' 'संपादके, तुम्ही जेव्हा बातम्या आणि संपादकीय यांचा मुडदा पाडायला लागलात तेव्हाच विचार बदलून टाकला.' विचारेंनी संपादकेंना विचारवाणी सांगतल्यावर नटवेला मात्र गाळातल्या गाळात हसू आले. 'अगदी बरोबर बोललात विचारे,' नटवेंना केसांना झटके देत संपादकेंच्या समोर बूम धरावा तसा मोबाईल धरला. 'तुम्ही आदी तो बूम सॉरी मोबाईल बाजूला घ्या. पण मला काय म्हणायचे, वांद्रेची ही पोटनिवडणूक एवढी प्रतिष्ठेची करायची गरजच काय? तासगावसारखी नाही का करता आली असती?' सत्या सदावर्तेंनी पोटनिवडणुकीच्या मुद्यावर बोट ठेवले तसे समाजे बोलते झाले, 'निवडणूक कुठली असली तरी ती निकोप व्हायला हवी. लोकांना मतदानाचा अधिकार आहे. त्यांनी तो बजावून योग्य उमेदवार निवडावा.' 'काय... काय म्हणता समाजे तुम्ही, हे आता शक्य आहे का? निवडणुकीपूर्वी काय झाले ते काय नव्याने सांगायला हवे का? नुसता आरोप-प्रत्यारोपांचा खेळ..हे कुठेतरी थांबायला नको का?' सत्या सत्य वदले तसे समाजे समजावणार इतक्यात सत्या पुन्हा बोलते झाले, 'समाजे, तुम्ही या सर्व गोष्टी थांबवायला उपोषणाला का नाही बसलात?' 'उपोषणाला बसून असले प्रश्न सुटले असते तर एक चांगला संदेश गेला असता,' विचारे मधेच बोलून गेले. या सर्व मुद्यांवर चर्चा सुरू असताना धूर्त राजकारणे मात्र हसत होते. आता त्यांना राहावेना...'आमची राजकारण्याची जात. जागा महत्त्वाची...कारण जागा मिळाली की जगायला मोकळे पुन्हा निवडणूक लागेपर्यंत.' राजकारणे बोलले आणि त्यानंतर सत्या कडाडले, 'तुम्ही तेच पाहा. बाकी काय पाहू नका. किती पैसा उधळला गेला असेल याच्यावर? तेवढा पैसा जनतेवर उधळला असता तर बरे झाले असते.' 'हे राजकारणी मंडळी कोणती गोष्ट मोठी करतील आणि कोणती नाही, हे सांगता येत नाही. त्यामुळे त्यांनी ही निवडणूक प्रतिष्ठेची केली आणि प्रतिष्ठाही पणाला लावली तसेच प्रतिष्ठाही घालवली,' विचारेंनी चिंता व्यक्त केली. 'आणि हो, या मीडियावाल्यांनी तर आणखी मोठी केली. संपादकेंनी लिहून लिहून मोठी केली आणि नटवेंनी वाचून वाचून चर्विली.' सत्यांची सत्यवाणी झाली. इतक्यात इतका वेळ शांत बसलेले सदा सामान्ये पोटतिडिकीने बोलले, 'या पोटनिवडणुकीत अनेकांची पोटे भरली असतील, पण सामान्यांची मात्र पोटे रिकामीच राहणार आहेत'. सामान्यांच्या या  सर्वसामान्य विचाराने कलानगरच्या कट्ट्यावरची चर्चा संपली.

माझ्या प्रिय सर्व मित्रांनो,

माझ्या प्रिय सर्व मित्रांनो,
थोड्याच दिवसात आपल्या भेटीला येतोय...नव्या स्वरूपात

प्रतिष्ठा पणाला लागणार

प्रतिष्ठा पणाला लागणार
वांद्रे पूर्व पोटनिवडणूक चुरशीची आणि प्रतिष्ठेची होणार याच्यात वाद नाही. शिवसेनाचा बालेकिल्ला पर्यायाने मातोश्रीच्या अंगणातही पोटनिवडणुकीचा सामना रंगणार आहे. या पोटनिवडणुकीत काँग्रेसचे नेते नारायण राणे उतरणार असल्यामुळे त्यांच्यासाठी ही लढत प्रतिष्ठेची ठरणार आहे. सध्या सर्वच पक्ष सत्ता समीकरणाच्या बेरीज-वजाबाकीमध्ये अडकलेले आहेत. त्यामुळे नारायण राणे यांनी राष्ट्रवादीचे सर्वेसर्वा शरद पवार यांची घेतलेली भेट ही या निवडणुकीच्या पार्श्वभूमीवर महत्त्वाची तर ठरतेच, पण अनेक राजकीय गणिते निर्माण करणारी ठरते. राष्ट्रवादीने वांद्रे पोटनिवडणुकीत उमेदवार न उतरवता राणे यांना पाठिंबा दिला. त्यामुळे नारायण राणे यांनी ही निवडणूक लढवण्याचा निर्णय घेतला. अर्थात राष्ट्रवादीने जरी नारायण राणे यांना पाठिंबा जाहीर केला तरी राणेंसाठी ही निवडणूक सोपी जाणारी नाही. त्याचबरोबर गेल्या दोन निवडणुकांमध्ये बाळा सावंत या मतदारसंघातून विजयी झाले आहेत. त्यांनी केलेल्या कामाच्या जोरावर तेथे भगवा फडकण्याची शक्यता जास्त आहे. हा मतदारसंघ मातोश्रीच्या अंगणात येत असल्यामुळे शिवसेनेसाठीही ही लढत प्रतिष्ठेची आहे. त्यातच काँग्रेसकडून राणे या निवडणुकीत उतरणार असल्यामुळे शिवसेनाही राणेंना पराभूत करण्यासाठी कंबर करणार यात वाद नाही. याच दृष्टिकोनातून शिवसेनेने बाळा सावंत यांच्या पत्नी तृप्ती सावंत यांना उमेदवारी दिली. यात भरीस भर म्हणजे या पोटनिवडणुकीतून भाजपनं माघार घेतली आहे. त्यामुळे लढत रंगणार आहे ती शिवसेना विरुद्ध काँग्रेस. त्यात दुसरा महत्त्वाचा मुद्दा म्हणजे ही निवडणूक लढवण्यास काँग्रेसने नारायण राणे यांनांच का विचारणा केली तो. मात्र शिवसेनेचा पराभव करायचा या उद्देशाने निवडणुकीत उतरलेले नारायण राणे शिवसेनेला पराभूत करतात की पराभव ओढवून घेतात, हे निकालानंतर स्पष्ट होईल. वांद्रे पोटनिवडणुकीत राणे विरुद्ध शिवसेना हा रंगणारा सामना कोण जिंकतो आणि कोण कोणावर जोरदार प्रहार करतो, हे पाहणे सर्वच राजकीय पक्षांना महत्त्वाचे ठरणार आहे. कारण सत्ता समीकरणाचे डावपेच यातून पुन्हा एकदा स्पष्ट होणार आहेत.

गणराज

आज लाडक्या गणरायाचं विसर्जन झालं...आणि गणरायाच्या पुढच्या वर्षीच्या आगमनाची ओढ आतापासूनच लागून राहिली